Misaka na sa napulo ang kumpirmadong nakabsan sa kinabuhi samtang anaa sab sa pito ang naangol sa nahitabong mangilngig nga disgrasya sa National Higway sa Prk 4, Brgy. Batomelong, General Santos City kagahapon. Nasayran nga naggikan dinhi sa dakbayan sa Davao ug padulong unta sa Gensan ang passenger van apan kalit na lamang mibuto ang ligid sa likod nga bahin niini maong misimang ang van ngadto sa pikas nga direksyon sa kalsada diin nakasugat niini ang usa ka 16-wheeler wing van ug pick-up nga paingon sab ang direksyon sa Davao. Gumikan sa kakusog sa impact, daw wala na naitsura ang van kung diin nalangkat pa ang atop niini ug nagpasad sab ang lawas sa mga biktima sa maong highway. Nasayran nga ang grupo sa mga empleyadong sakay sa Toyota Hi-Ace van ang gikan lamang nagpahigayon sa ilang team building sa Samal Island, Davao del Norte.
Giila usab ang mga nakabsan sa kinabuhi nga sila:
1. Noel Podadera, 41 anyos, lumulopyo sa Klinan, Polomolok, South Cotabato, driver sa commuter van (DOA)
2. Lalaine Joy Labang, 28 anyos, residente sa Barangay Fatima, GSC (DOA)
3. Mylene Donaldo, 44 anyos, residente sa barangay Calumpang (DOA)
4. Carlo Advincula, 30 anyos, residente sa Crossing Rubber, Tupi, South Cotabato (DOA)
5. Regie Pag-ong, 27 anyos, residente sa Barangay Fatima, Gensan (DOA)
6. Ryan Jay Niñez, 36 anyos, residente sa Polomolok, (DOA)
7. Alfredo Abatayo, 47 anyos, residente sa Purok 3, ladol, Alabel, Sarangani Province (DOA)
8. Salvacion Masugbod, 50 anyos, residente sa Zone 7, Uhaw, Barangay Fatima, Gensan (nakabsan sa kinabuhi samtang ginatabang sa Dr. Jorge Royeca Hospital)
9. Rose Ann Macpal, 30 anyos, residente sa Purok Maguindanao, Labangal, Gensan, (nakabsan sa kinabuhi samtang ginatabang sa S. Elizabeth Hospital)
10. Cesar Andaya, 42 anyos, residente sa Guihing Relocation, Hagonoy, Davao Del Sur. (gideklarang patay samtang gitabang sa Doctors Hospital)
