DAVAO CITY – Naglaom ang Department of Education 11 nga makab-ot o malapsan ang 1.4 million nga ihap sa mga estudyante nga mutungha alang sa school year 2023-2024.
Sumala sa tigpamaba sa DepEd 11 nga si Jenielito “Dodong” Atillo, atol sa ekslusibong pakighinabi sa Bombo Radyo Davao, usa sa mga ginatutukang rason sa matud pa nagkaubos nga turn-out sa mga estudyante ang wala pa na-report nga mga enrollees gikan sa mga lagyong tulunghaan, apan gipasalig sa opisyal nga ilang maabot ang nasangpit nga gidaghanon sa mga estudyante.
Subay sa datos sa buhatan, anaa sa 1,236,229 ang kinatibuk-ang ihap sa mga enrolees diin sa maong ihap, 623,854 ang lalaki ug 612,375 ang babaye.
Katugbang kini sa 86.7% ang ihap sa mga enrollees nga mubo sa gilaumang ihap nga 1.4 million.
Gipaklaro sa opisyal nga abli gihapon sa pagdawat ang mga tulunghaan apan kinahanglan sabutan una kini tali ginikanan ug principal sa tulunghaan sanglit ginahulat pa gikan sa DepEd secretary ang paglugway sa enrolment nga nahuman kaniadtong Agosto 26.
Sa laing bahin, gipatim-aw sa Department of Education 11 nga dili pa nila ginakonsidera ang triple shifting sa mga klase karong panahuna.
Sumala gihapon ni DepEd 11 spokesperson Jenielito “Dodong” Atillo, layo pa sa katumanan ang nasangpit nga siste sa klase gumikan sa mubo lamang nga ihap sa mga estudyante kon itandi sa kahimtang sa pipila ka mga tulunghaan sa Metro Manila nga nagapahigayon og klase gumikan sa nag-awas awas nga gidaghanon sa mga estudyante.
Hinuon, aron matubag ang kakuwangon sa klasrum, duna lamang Morning and Afternoon shifting ang gipatuman sa pipila ka mga tulunghaan nga dunay taas nga ihap sa mga estudyante.
Niapela sab ang buhatan ngadto sa mga ginikanan nga konsiderahon ang pagpaenrol sa mga tulunghaan nga duol sa ilang lugar aron ma-congest ang dagkong ihap sa mga estudyante partikularmente sa mga dagkong public schools sa dakbayan.
via || Bombo LJF
