DAVAO CITY – Gipamulong sa opisyal sa Davao City Tourism Operations Office nga panahon na aron pakusgon ang industriya sa turismo sa Davao City human kini mapili sa usa ka dagkong media company sa kalibutan isip usa sa 18 ka mga underrated places sa Asya.
Matud pa ni DCTOO officer in charge Jennifer Romero, dagkong hagit alang sa dakbayan ang maong distinksyon aron pakusgan ang turismo sa Davao City ug Davao Region, ug aron sab managhan ang mga langyaw ug lokal ang buot makabisita sa rehiyon.
Hinuon, usa sab kini sa buot makab-ot sa ipahigayong MICECON 2023 nga magsugod karong Marso sunod tuig, nga mapromotar ang “bleisure” kon business and pleasure experience alang sa mga turista dinhi sa dakbayan.
Kahinumdumang napili ang Davao City isip Asia’s Top 18 underrated travel destinations, sumala pa sa usa ka international news network.
Giila sab sa maong seleksyon ang mga gipasigarbong destinasyon ug icons sa Davao City sama sa Roxas Night Market, lamian nga barbecue ug grilled seafood, ang Kadayawan Festival, prutas nga Durian, ug ang Samal Island nga dali lamang maabot ug pila lamang ka kilometro gikan sa Davao City.
via || Bombo LJF
