DAVAO CITY- Nihatag og katin-awan ang tigpamaba sa Davao City Police Office, kalabot sa pamahayag ni PRO XI Regional Director, Police Brigadier General Nicolas Torre III.
Sumala pa ni P/Capt. Hazel Tuazon, tumong lamang sa maong opisyal ang pagsuta sa hinungdan sa mga nagkuyanap nga krimen dinhi sa dakbayan ug ang pagmugna og mga sulosyon kabahin niini.
Atol sa gipahigayong meeting sa PRO XI kauban ang mga nagkadaiyang station commanders sa dakbayan, nangayo og katin-awan ang bag-ong Regional Director sa saktong numero sa mga natalang krimen, kung diin kadaghanan niini ang niresulta sa pagpatay kung itandi sa mga pisikalan lamang nga insidente.
Gumikan niini, gipunting sa opisyal ang kamahinungdanon sa pagbutyag og saktong numero sa mga insidente aron mapakita sa publiko ang tunhay nga peace and order situation sa Davao City.
Sumala pa ni Torre nga sa maong paagi, makita sa katawhan ang pagpaningkamot sa mga otoridad sa laraw nga magpadayon ang kalinaw ug kahapsay sa Davao City.
Kahinumduman nga sa nakalabay nga adlaw, gibutyag sa usa ka journalist ang balita nga matud pa niluwat og pamahayag si Torre nga wala nay mahitabo pang pisikalay dinhi sa syudad, gumikan diritso na kining magpinatyanay.
Samtang, nagpaguwa na og katin-awan ang PRO XI kalabot sa maong misinterpreted news ug gipasalig sa maong buhatan ang padayong paghatod og maayong serbisyo ngadto sa katawhan.
