DAVAO CITY Padayon karon ang pahimangno ni Davao City Police Office (DCPO) chief Police Colonel Alexander Tagum ngadto sa publiko nga likayan ang pagyaga-yaga pinaagi sa pagtawag sa emergency 911 hotline sa siyudad gumikan kay mamahimo sumala pa nga mapasakahan ang mga nahisgutan sa higayon nga mailhan kini otoridad.
Sa kasamtangan, nakiglambigit na matud pa sila sa Philippine National Police (PNP) Anti-Cybercrime Group aron subayon ang mga prank callers.
Gikanayon sab sa opisyal nga nakig-alayon sab karon ang Explosive and Ordinance Disposal (EOD) team sa Task Force Davao, Police Regional Office (PRO) 11, ug Central 911 aron nga maaksiyonan ang mga prank calls.
Una ng nasayran sa nahisgutan nga makadawat sumala pa ang nahisgutan nga hotline ug average nga three prank calls matag adlaw nga usa ka suliran sa bahin sa police officers nga muresponde.
Gitataw sab ni Tagum nga nakig-alayon na sab siya sa PNP Anti-Cybercrime Group aron nga ma-protektahan ang integridad ug tukma nga operasyon sa emergency hotline sa siyudad ug mapugngan kadtong adunay dautan nga plano.
