DAVAO CITY – Nahimong hugyaw ang gipahigayong opisyal nga pag-abri sa Davao Regional Athletics Association kon DAVRAA Meet 2024 kagahapon sa UP Sports Complex sa Bago Oshiro, Tugbok, ning dakbayan sa Davao.
Sa maong opening ceremony, dungan nga nag-parada ang anaa sa 7,000 ka mga student athletes ug contingents gikan sa mga schools division sa rehiyon nga gilangkuban sa Digos City, Davao City, Davao de Oro, Davao Occidental, Davao del Norte, Mati City, Davao Oriental, Panabo City, Tagum City, ug Samal Island.
Gitambungan ang seremonya ni VP ug DepEd Sec. Sara Duterte nga nagpadayag sab og well wishes alang sa mga musalmot nga mga student athletes.
Una ng gibutyag nga mokabat sa 400 ka mga personahe gikan sa CDRRMO, CHO, Barangay Disaster Risk Reduction Management Council ang ipakatap aron maghatag og medikal nga pag-atiman atol sa sports meet.
Kahinumduman usab nga mokabat sa kapin 14,000 ka mga security personnel ang ipakatap alang sa pagbantay sa mga delegado diin kapin 1,800 ang ihap sa ipang deploy matag adlaw diin target sa Davao City Public Safety and Security Office ang zero total incident.
Samtang gikmanayon sab sa Davao City Police Office nga andam ang ilahang 1,531 Personnel aron sa pagbantay sa DAVRAA 2024 Event ug Delegate Billeting Areas.
Sa pikas bahin, gipasalig sa Department of Education kon DEPED 11 nga ilang ipa-suspend ang mga dula sa DAVRAA Meet kon ilabihang muinit pa ang temperatura karong panahona.
Sumala ni DepEd 11 spokesperson Jenielito Atillo, pagahunungon ang sporting event sa alas-10 sa buntag ug ipadayon kini pagka-alas 3 sa hapon depende sab sa mamahimong assessment.
Nagpadayon usab ang pag monitor sa City Sports Development alang sa heat index aron mahibal-an ang posibilidad nga kanselahon ang bisan unsang sports event kung adunay masinatian nga grabeng kainit.
Pahimangno usab niini sa mga atleta nga kanunay mahimong hyrated ingon man sa pag-inom og daghanang tubig aron malikay sa bisan unsang sakit.
