Padayon ang konstruksyon sa Davao-Samal Bridge Project bisan pa sa pagpagula sa Korte Suprema og Writ of Kalikasan, hangtod nga makadawat kini og opisyal nga mando nga ipahunong ang proyekto.
Kini ang gipadayag sa Department of Public Works and Highways (DPWH) Region 11, diin mitumbok nga walay legal nga rason nga muhunong sila sa ilang ginahimo gawas kung adunay klarong sugo gikan sa korte.
Sa kasamtangan, anaa sa 38.07 porsyento na ang nahuman sa konstruksyon sa tulay nga gikatakdang molungtad og 3.98 kilometro ug magsumpay sa Samal Island ug Davao City.
Niadtong Martes, Hulyo 3, mipagula ang Korte Suprema og Writ of Kalikasan isip tubag sa petisyon nga misupak sa padayong implementasyon sa maong proyekto.
Matod pa ni Dean Ortiz, ang tigpamaba sa DPWH Region 11, nga andam ang ilang buhatan nga motubag sa Korte Suprema sulod sa napulo ka adlaw human madawat ang mando.
Sa laing bahin, ang Department of Environment and Natural Resources (DENR) Region 11 mipadayag usab nga magpabilin silang kasaligan nga tigdumala sa pagpanalipod sa kinaiyahan ug motuman sa mga legal nga proseso kabahin sa proyekto.
Ang tulay gipundohan pinaagi sa loan agreement sa China, nga adunay kantidad nga ₱23.52 bilyon.
Gilauman nga kini matapos sa tuig 2028. Apil sa giingong mga gipasakaan og petisyon ang DPWH, DENR, ang Samal Island Protected Landscape and Seascape Protected Area Management Board, ug ang China Road and Bridge Corporation.
Giinsister sab sa DPWH nga ang maong proyekto hugot nga gitan-aw, giplano, ug gisusi sa teknikal ug environmental nga aspeto, hinungdan nga ilang ipadayon ang trabaho.
Sa pikas bahin, daghang residente sa Samal Island, mga negosyante, ug mga turista ang nagpahayag og kasubo sa pagpagula sa Writ of Kalikasan, tungod kay alang kanila dako og natabang ang maong tulay sa paspas nga transportasyon, kalamboan sa turismo, ug pagpadako sa ekonomiya sa maong isla.
