Miabot na sa Tagum City ang mga atleta nga mopartisipar sa Davao Region Athletic Association (DAVRAA) Meet 2025 nga ipahigayon karong Marso 9-15, 2025 sa Davao del Norte Sports and Tourism Complex.
Sumala ni DepEd XI Spokesperson Genilito Dodong Atillo, andam na ang tanang preparasyon alang sa kompetisyon nga sudlanan sa 11 ka Schools Division sa rehiyon.
Gilauman nga ipakita sa mga atleta ang ilang kusog ug talento sa nagkadaiyang sports events.
Sa miaging tuig, overall champion ang Davao City Durians sa DAVRAA Meet 2024.
Gipasabot ni Atillo nga ang DAVRAA usa ka dakong oportunidad aron mapalambo ang abilidad sa mga atleta sa rehiyon ug mapasaka ang ilang ranggo sa Palarong Pambansa.
Gitinguha sa DepEd XI nga makuha sa Davao Eagles ang 3rd place sa Palarong Pambansa 2025 nga ipahigayon sa Laoag, Ilocos Sur sa Mayo 24-31, 2025, human nga nahimong top 4 ang rehiyon sa Palarong Pambansa 2024 sa Cebu City, diin nakadaug kini og 32 ka gold, 25 ka silver, ug 35 ka bronze medals.
Gisuportahan sa Provincial Government sa Davao del Norte, Tagum City LGU, ug Schools Division sa Tagum ug Davao del Norte ang maong kalihokan isip host sa kompetisyon.
Naghinay-hinay nang nagpangandam ang mga atleta, coach, ug opisyales alang sa umaabot nga mga DAVRAA 2025.
Sa kasamtangan, andam na usab ang kapulisan alang sa seguridad sa maong kalihokan.
Giawhag sa otoridad ang tanang atleta ug mga bisita nga magmatngon ug musunod sa balaod aron masiguro ang hapsay ug malinawon nga kompetisyon.
Gipahibalo usab sa DepEd XI nga andam na ang school assignments alang sa mga partisipante nga temporaryong magpabilin sa Tagum City atol sa DAVRAA Meet.
Dugang pa, giatiman na sa host LGU ang mga pasilidad sa Davao del Norte Sports and Tourism Complex, ug ipahimutang ang medical teams ug emergency response units aron masiguro ang kahimsog ug kaluwasan sa tanang atleta ug opisyales.
