DAVAO CITY – Nasinati na sab ang usa ka 4.6 magnitude nga linog sa Davao de Oro kagahapon bandang alas-5:59 sa hapon. Namatikdan nga ang episentro niini, nahimutang sa 12 kilometros, kasadpan bahin sa Nabunturan, sa gilawmon nga 11 kilometros.
Natala ang Intensity V sa Nabunturan; samtang Intensity II ang nasinati sa Compostela; ug Intensity I sa Maco. Subay sa Instrumental Intensity sa PHILVOLCS, Intensity I ang nasinati sa Davao City.
Gipaklaro sa PHILVOLCS nga usa kini ka aftershock human sa pagtay-og sa 6.1 magnitude nga linog sa Davao de Oro kaniadtong Pebrero 1.
Sa pikas bahin, nagpagawas na og insyal nga datos ang Davao de Oro PDRRMO kalabot sa nahitabong linog as of February 4, diin anaa sa 229, 647 ka mga pamilya kon 779,918 ka mga indibidwal ang ilabihang naapektuhan.
Gikatala sab ang unom ka nangaangol apan walay nakabsan sa kinabuhi atol sa linog. Giguba sab sa linog ang unom ka mga dalan ug duha ka tulay sa probinsya.
Gipapaigmat gihapon sa lokal nga kagamhanan ang katawhan sa tibuok probinsya tungod sa gikatahong aftershocks.
via || Bombo LJF
