DAVAO CITY – Wala nakab-ot sa Davao City Transport and Traffic Management Office (CTTMO) ang target nila nga koleksyon gikan sa public pay parking sa unang unom ka bulan ning tuig kasamtangan.
Gibutyag ni Dionisio Abude, hepe sa CTTMO, nga anaa lamang matud pa sa P5 million ang nakolekta karon sa ahensya diin mas ubos kini kung itandi sa target nila nga anaa sa P20 million sa 2020-2021 nga koleksyon sa pay parking.
Gilantaw karon sa maong ahensya nga ang nasinatiang pandemya sa nasud ang hinungdan sa ubos niini nga collection.
Gawas niini, gibutyag usab ni Abude nga adunay pipila ka mga public pay parking areas ang wala nakapadayon sa pagkolekta og parking fees diin miresulta kini sa P3 million nga kawad-on.
Naapektohan sab ang koleksyon sa ahensya sa gipahigayong underground cabling constructions sa downtown area.
Hinoon, dako ang pagtuo sa opisyal nga makab-ot niini ang target nga P10 million nga koleksyon sulod karong tuiga.
