DAVAO CITY – Subling nanawagan ang ahesiya sa Department of Agriculture (DA) Davao ngadto sa publiko nga mamahimong gigikanan sa Avian Influenza (Bird Flu) ang mga mamatikdan nga migratory birds nga sagad muadto sa pipila ka mga lugar dinhi sa dakbayan.
Sumala pa kang Dr. Armie Capuyan, head sa Plant Pest and Animal Disease Monitoring and Surveillance Section of DA-Davao, angayan nga magpatuman ang mga poultry business owners ug bio-security measures arun malikayan ang pagsulod sa kagaw dinhi sa rehiyon.
Gipasabot sa opisyal nga dili makontrola ang pagsulod sa migratory birds hinungdan nga gitambagan nila ang mga mag-uuma nga kinahanglan likayan niini nga dili ma-expose ang ilang mga alaga nga mga langgam ug kinahanglan nga dili makaduol ang mga migratory birds sa mga poultry o farm animals.
Tipik lamang ang pahayag sa opisyal human nga kamatikdan ang pagsulod sa mga migratory birds sa mga farms arfun nga kaunon ang mga animal feeds nga nagkatag.
Gitino ni Capuyan nga ang Avian Influenza mamahimong makatakod usab sa mga hogs, hinungdan nga kinahanglan ipatuman ang biosecurity measures sa susama nga mga lugar.
Sa kasamtangan nagpabilin pa gihapon nga walay natalang kaso sa Avian Flu sa siyudad apan nangandam pa gihapon sila arun nga makahimo gilayon ang ahensiya ug tukma nga mga lakang.
Kahinumduman nga ang kaso nga natala sa lungsod sa Magsaysay Davao del Sur ang gikan sa gipalusot nga mga pato nga gikan sa kasikbit nga probinsiya sa Soccsksargen.
