DAVAO REGION- Patay ang usa ka lalake human nga gipusil sa walaila nga suspek kagabii.
Giila ang biktima nga si Welbert Ceneza Quiño, 35 anyos, minyo, trabahante sa konstruksyon, ug residente sa None, Purok 3, Balutakay, Hagonoy, Davao Del Sur.
Subay sa report kapulisan, alas 10:35 kagabii natigayon ang pagpamusil diin nahitabo kini sa usa ka tindahan, nga nahimutang sa Davao-Bukidnon Road, San Miguel Parish, Sitio Upper Marahan, Brgy. Marilog, Davao City.
Ang suspetsado gihulagway nga nagmaneho og usa ka motorsiklo, nagsul-ob og itom/ug puti nga t-shirt, ug itom nga short pants.
Sumala pa sa imbestigayon nga samtang ang biktima naglingkod sulod sa tindahan, kalit nga miduol sa likod niya ang usa ka maila nga suspetsado ug gipusil ang biktima sa makadaghang higayon.
Gipaningkamotan pa sa biktima nga modagan gawas sa tindahan apan tungod sa kadaghan sa samad pinusilan miresulta kini sa iyang hinanaling kamatayon.
Human sa maong panghitabo dali nga misibat ang suspetsado sakay sa motorsiklo padulong sa wala matino nga direksyon.
Dali nga miresponde ang 911 ambulance sa lugar sa insidente apan nagpahayag nga ang biktima wala nay mga senyales sa kinabuhi.
Nagpahigayon og ocular investigation ang mga otoridad diin narekober gikan sa crime scence mao ang tulo ka mga basiyo sa punto 45 nga pistola ug pitaka nga adunay nagkalain-laing mga identification cards nga karon anaa na sa pag-amuma sa otoridad.
Ang lawas sa biktima gidala sa Angel Funeral Calinan ning dakbayan arun sa gikinahanglan nga autopsiya.
Sa pagka karon, ang mga otoridad nagpadayon sa hot pursuit operation aron alang sa pagsikop sa suspetsado.
