DAVAO CITY- Nipadayag og pagsabot si Kanhi Pangulo Rodrigo Duterte sa gikanayong bloodless campaign sa Administrasyong Marcos batok sa illegal nga droga.
Sumala pa ni FPRRD, dili niya mabasol ang desisyon sa pangulo sanglit nagdako kini nga adunay pagsalig ug kahadlok sa labawng makagagahom.
Kahinumduman nga gipasundayag ni PBBM ang pagdakop sa mga empleyado sa gobyerno ug mga high value individuals tungod sa paggamit og ginadili nga droga nga gibutyag niya atol sa iyang state of the nation address.
Sumala pa ni Duterte, ginapersonal niya ang tanang madungog nga balita ug impormasyon kabahin sa mga inosenteng indibidwal nga nakabsan sa kinabuhi tungod lamang sa mga dili maayong aksyon sa mga nagagamit og illegal nga droga.
Kini matud pa ang rason sa kanhi pangulo sa paghatag og abiso sa mga kapulisan nga buhaton ang ilang trabaho.
Dugang pa sa kanhi pangulo nga ang pagpahugot sa mga seguridad sa kadagatan ang gikinahanglan tagaan og pagtagad karong panahona sanglit mao kini ang sagad ginalutsan sa droga.
Samtang, gikanayon sab ni Duterte nga gumikan nagkadaghan na ang populasyon sa Pilipinas ug dili tanan ang matagaan og trabaho, daghanan na lamang karon ang modesisyon sa paglambigit niini.
