DAVAO CITY – Sukad nga gimando ni Pangulong Rodrigo Duterte ang pagpasara sa tanan nga mga investment schemes, nakadawat na karon ang Davao City Anti-Scam Unit (ASU) ug walo ka mga reklamante.
Sumala pa kang ASU chief Simplicio Sagarino, unom sa walo ka mga reklamante ang dili taga dakbayan sa Davao.
Naggikan ang mga nahisgutan sa Midsayap, Cotabato, ug Tagum Davao del Norte diin wala sumala pay Anti-Scam Units sa maong area. Gikanayong wala nakadawat ang mga nahisgutan ug pay outs gikan sa investment firms.
Gani usa sa mga reklamante ang retired teacher gikan sa Cotabato nga naka-invest ug P2.4 million sa Everarm Marketing.
Sagad sa mga nahisgutan ang miadto dire sa dakbayan sa Davao sa pagtuo nga matabangan sila sa ilang problema ni Davao City Mayor Sara Duterte-Carpio.
Gitataw sab ni Sagarino nga gi-proseso na karon sa ASU ang referral documents aron nga i-turn over ang reklamo sa mga biktima ngadto sa National Bureau of Investigation (NBI) alang sa dugang nga imbestigasyon.
Nagtuo sab ang ahensiya nga posibleng madungagan pa ang mga reklamante bisan unsang orasa ilabi na nga daghanan pa gihapon ang wala nakadawat sa ilang pay-out.
Nag-ugat ang pagpasara sa mga investment scheme human nga gimando ni Pangulong Rodrigo Duterte ang pagpasara sa Kapa Community Ministry International Inc. (Kapa).
