DAVAO CITY – Hustisya ang gisinggit sa pamilya sa labing ulahi nga biktima sa pagpamusil sa Tagum City kagabii lamang.
Kahinumduman nga patay ang biktima nga si Judylou Palas, 22 anyos, usaka magtutudlo ug taga Purok Dahlia, Barangay Visayan Village, Tagum City.
Subay sa report naa ang biktima sa balay sa iyang iyaan kauban ang iyang mga igsuon ug mga ig-agaw, ug paingon na unta silang manihapon sa dihang adunay nanoktok sa pultahan.
Apan, wala sumala pa nila gi-abrihan ang pultahan hinungdan nga gisipa kini sa suspect ug sa dihang naabri na, walay daghang estorya kalit nga gipusil ang biktima nga na-igo sa iyang dughan, siko ug uban pang bahin sa lawas.
Nasamdan usab sa nahisgutang pagpamusil ang manghud sa biktima ug naa na hinuon sa luwas nga kahimtang sulod sa ospital, samtang swerte usab sumala pang nakatago ang lain pang usa.
Dako ang katahap sa mga kaila sa biktima nga adunay kasayuran sa investment scam sa Tagum City ang pagpatay kang Judylou sanglit agent sumala pa sa PLC ang inahan niini.
Nasayran nga bag-uhay lamang mi-graduate sa college ang biktima ug kasamtangan nga nagtrabaho sa St.Thomas More School of Law and Business.
Gipamugos sa iyang mga higala nga inosente si Palas ug dili kini angayan nga i-angin kung unsa man ang problema sa iyang iunahan labot sa investment scam.
