Gipahayag ni Atty. Paolo Panelo, legal spokesperson ni Vice President Sara Duterte, nga nakadawat ang Bise Presidente og mensahe sa pagpangayo og tabang ug pagluwas gikan sa account sa usa ka kanhing kawani sa ilang panimalay pasado alas-11:19 sa gabii niadtong Nobyembre 16, 2026.
Sumala sa pahayag ni Panelo, nakabutang sa maong mensahe nga anaa kuno sa kustodiya o kontrol sa pipila ka indibidwal sa Manila ang kanhing kawani human pahibaw-on nga adunay hulga sa iyang kinabuhi.
Giingong gipugos usab kini sa pagpirma sa usa ka dokumento apan mibalibad kini.Gikumpara usab sa legal spokesperson ang maong insidente sa nahitabo kang Jefry Tupas niadtong Setyembre 29, 2026, diin giingong gipahibalo usab kini sa mga ahente sa National Bureau of Investigation (NBI) nga nameligro ang iyang kinabuhi ug misulay sa pagdala kaniya ngadto sa Manila.
Sa pagkakaron, wala pa masayran ang eksaktong nahimutangan sa kanhing kawani ug wala pa usab makumpirma ang iyang kahimtang, sumala pa ni Panelo. Samtang, nagpahayag og kabalaka ang kampo ni Duterte nga ang maong insidente kabahin kuno sa kampanya sa administrasyong Marcos nga gamiton ang mga institusyon sa estado, lakip ang NBI, aron manghadlok ug mamugos sa mga indibidwal nga mahimong mga bakak nga saksi batok sa Bise Presidente.
Dugang pa ni Panelo, gitumong sa maong alegasyon ang paggamit sa mga ahensiya sa gobyerno alang sa politikal nga katuyoan ug ang pagpahuyang sa pagpatuman sa balaod.Tungod niini, nanawagan ang abogado sa publiko, media ug mga hingtungdang institusyon nga hatagan og pagtagad ang maong insidente ug siguruhon ang kaluwasan ug kagawasan sa kanhing kawani.











