-- ADVERTISEMENT --

Gidakop sa kapulisan ang kapin 300 ka mga raliyista sa Muntinlupa City ug Manila kaniadtong Dominggo, Nobyembre 15,2026 samtang nangandam sa pagmartsa padulong sa Philippine International Convention Center (PICC) sa Pasay City diin gipahigayon ang ika-49 nga ASEAN Summit.

Mga 300 kanila ang partisipante sa Lakbayan ng Timog Katagalugan nga nagpabilin sa People’s Park sa Muntinlupa City, samtang siyam ka mga raliyista ang gidakop usab sa Liwasang Bonifacio sa Manila atol sa panagbangi tali sa mga demonstrador ug kapulisan.

Matod ni Bayan-Timog Katagalugan spokesperson Lucky Oralleo, kapin 200 ka mga pulis ang gipakatap aron pugngan sila sa paggawas sa People’s Park.

Samtang, gipadayag ni labor leader Jerome Adonis nga adunay mga raliyista nga nasamdan sa komosyon, lakip ang usa nga gikatahong nakuyapan human masipa-an.

Sumala sa kapulisan, wala makakuha og permit ang mga grupo aron makapahigayon og rally sa gawas sa gitakdang freedom park. Giinsistir usab ni Police Captain Felino Nebato, legal officer sa Manila Police District, nga sa gawas sa Liwasang Bonifacio gidakop ang mga raliyista.

-- ADVERTISEMENT --

Lakip sa mga gipunting sa protesta ang mga polisiya sa gobyerno nga giisip nilang supak sa interes sa mga mamumuo, ang pagbisita ni United States President Donald Trump, ug ang gisugyot nga pagtukod sa Pax Silica hub sa New Clark City, Tarlac.

Sa pagkakaron, nagpabiling sentro sa seguridad ang Manila ug ang mga palibot sa summit venue samtang nagpadayon ang mga kalihokan kalabot sa ASEAN Summit.