Gipahibalo ni National Food Authority Administrator Larry Lacson nga adunay dakong pagkunhod sa produksyon sa humay karong kasagsagan sa wet harvest season.
Matod ni Lacson, lakip sa mga nag-unang hinungdan niini ang desisyon sa pipila ka lokal nga mag-uuma nga dili una magtanom tungod sa taas nga gasto sa produksyon, ilabi na ang pagsaka sa presyo sa mga abono, ingon man ang dakong kadaot nga nahimo sa habagat ug sunod-sunod nga mga bagyo sa mga umahan ug kagamitan.
Sa pagkakaron, nagkantidad og P16 hangtod P17 ang gibanabanang puhunan sa mga mag-uuma sa matag kilo, samtang naghulat pa ang ahensya sa opisyal nga datos gikan sa Philippine Statistics Authority (PSA) aron mahibal-an ang kinatibuk-ang porsyento sa pagkunhod sa ani.
Isip sayong pagpangandam alang sa umaabot nga dry season harvest, diin gilauman nga magsugod pag-usab sa pagtanom ang mga mag-uuma sa Enero, padayon ug gipadali sa ahensya ang pagtukod sa dugang nga mga dryer ug miller nga gilauman mahuman sa sunod tuig.
Lakip sa mga lakang sa ahensya ang pag-abang sa dugang 65 ka pribadong bodega, gawas pa sa bulag nga nahuman nang pag-ayo sa kaugalingong mga pasilidad niini.
Tungod niini, ang kinatibuk-ang kapasidad sa nasod sa pagtipig og humay ug bugas mahimo nang moabot sa usa ka milyon ka metriko tonelada.
Dugang niini, lakip usab sa mga gitukod ug giablihang bodega sa NFA ang mga nahimutang sa Dumangas ug ubang bahin sa Iloilo; sa Region 5, partikular sa Albay, Camarines Sur ug Catanduanes; ug sa Region 4, sa Palawan ug Occidental Mindoro.
Matod ni Lacson, dako og ikatabang ang maong mga proyekto aron mas mapalig-on ang ilang palay procurement program ug masiguro ang maayong serbisyo alang sa mga mag-uuma bisan pa sa mga hagit nga giatubang sa sektor sa agrikultura.
