Nadakpan ang 19 ka indibidwal human gi-raid sa mga operatiba sa Philippine National Police (PNP) ang usa ka gidudahang international online sabong hub sa Barangay Poblacion, Pandi, Bulacan kaniadtong nakalabay’ng adlaw.
Gipahigayon ang raid pinaagi sa Search Warrant nga gi-isyu sa Regional Trial Court sa Malolos City.
Adunay duha ka studio ang moang pasilidad nga naay livestreaming equipment ug computer systems nga gigamit sa pagpasalida sa mga away sa manok o cockfighting ug pagdawat sa mga pusta gikan sa mga bettor sa Mexico, Vietnam, ug Cambodia.
Narekober usab ang upat ka panabong nga manok ug nagkalain-laing kagamitan sa pagsibya. Lahi sa naandan nga sabong, walay tari ang mga manok ug ipatungtong kini sa lingin nga lamesa, diin ang unang mahulog maoy pildi. Kapin 500 pa ka manok ang nakaplagan sa maong compound.
Pasakaan og kaso ang 21 ka indibidwal, lakip ang 19 nga nadakpan ug ang giingong tag-iya ug supervisor nga wala sa lugar atol sa raid.
Atubangon nila ang mga kaso kalabot sa paglapas sa Presidential Decree No. 449 o Cockfighting Law of 1974, Executive Order No. 9, Series of 2022, ug Republic Act No. 10175 o Cybercrime Prevention Act of 2012.
Gipangulohan ang operasyon sa Regional Special Operations Group ug Regional Intelligence Division 3, uban ang lokal nga kapulisan.
