Misaka na sa ranggong Police Brigadier General si Philippine National Police (PNP) Public Information Office Chief ug Spokesperson Allen Rae Co human maaprobahan ang iyang promosyon gikan sa Police Colonel.
Base sa memorandum nga adunay petsang Nobyembre 4, 2026, apil si Co sa 17 ka opisyal sa nasudnong kapulisan nga nakadawat og mas taas nga ranggo.
Gawas kang Co, lima pa ka Police Colonel ang gipataas ngadto sa ranggong Police Brigadier General, samtang 11 ka Police Lieutenant Colonel ang misaka sa ranggong Police Colonel.
Gipirmahan ni Pangulong Ferdinand Marcos Jr. ang mga promotion order nga gipadala ngadto sa Department of the Interior and Local Government (DILG) pinaagi sa Office of the Acting Executive Secretary.
Kahinumduman nga gi-appoint si Co isip acting chief sa PNP Public Information Office kaniadtong Mayo 2026, puli kang Police Brigadier General Randulf Tuaño nga gibalhin sa Police Regional Office 6.
Sa wala pa ang iyang pagpili sa PNP PIO, nahimo usab si Co nga City Director sa Baguio City Police Office, Deputy City Director for Administration sa Quezon City Police District ug Acting Deputy Regional Director sa Police Regional Office 2.
