Gilaumang mosaka og hapit 18% ang kasagarang presyo sa bugas sa tibuok kalibutan sa 2027 tungod sa hulga sa kusog nga El Niño nga posibleng makaapekto sa ani sa dagkong mga producer sa bugas, ilabina sa Asia.
Base sa pinakabag-ong forecast sa Business Monitor International o BMI, usa ka research unit sa Fitch Solutions, posibleng moabot sa 16 dolyar ug 50 sentimos kada hundredweight ang average nga presyo sa rough rice futures sa Chicago Board of Trade sa sunod tuig.
Mas taas kini og 17.9% kumpara sa gipaabot nga 14 dolyar kada hundredweight karong 2026.
Gilauman usab sa BMI nga magpabiling taas ang presyo sa bugas hangtod sa unang quarter sa 2027, samtang posibleng maapektuhan sa El Niño ang panahon sa pagtanom sa dagkong mga nasod nga nagproduce ug nag-export og bugas.
Lakip sa mga nasod nga nameligro sa pagkunhod sa ulan ug pagsaka sa temperatura ang India ug Thailand.
Gibanabana nga mokunhod og 4.6% ang produksyon sa bugas sa India ngadto sa 147 milyong tonelada sa crop year 2026 hangtod 2027, samtang posibleng moubos og 1.9% ang produksyon sa Thailand ngadto sa 20.3 milyong tonelada.
Sa kinatibuk-an, gipaabot sa BMI nga mokunhod og 1.4% ang global rice production ngadto sa 537 milyong tonelada.
Tungod niini, posibleng makasinati og kakulang sa suplay ang merkado sa kalibutan, diin gibanabana nga moabot sa 539.8 milyong tonelada ang konsumo, mas taas kaysa gipaabot nga produksyon.
Bisan pa niini, gipasiugda sa BMI nga wala pay lig-on nga timailhan sa dakong kakulang sa suplay, tungod kay taas gihapon ang global rice inventories sa pagsugod sa crop season.
Sa Pilipinas, una nang mipahimangno ang Department of Agriculture nga posibleng mokunhod og 700,000 hangtod usa ka milyong metriko tonelada ang produksyon sa bugas tungod sa El Niño.
Sa pinakagrabeng senaryo, posibleng moabot sa ₱20 bilyong ang kalugi sa sektor sa agrikultura tungod sa grabeng kainit sa panahon.
