Susihon sa House prosecution team ang bisan unsang prenuptial agreement nga ipresentar sa kampo ni Vice President Sara Duterte atol sa impeachment trial, lakip ang petsa sa pagkahimo niini ug kung makatubag ba kini sa mga alegasyon kabahin sa iyang giingong unexplained wealth.
Sumala kang House impeachment adviser Robert Ace Barbers, dili awtomatikong makasulbad sa mga pangutana bahin sa financial disclosures sa bise presidente ang maong kasabotan. Kinahanglan usab susihon ang sulod niini ug ang mga kondisyon nga gilatid.
Gipunting usab ni Barbers ang panginahanglan nga matubag ang giingong kakulang sa deklarasyon sa Statement of Assets, Liabilities and Net Worth (SALN) ni Duterte. Gikuwestiyon niya ang depensa nga naapil na sa kategoryang “other personal properties” ang mga deposito sa bangko.
Base sa datos nga gipresentar sa prosekusyon, mikabat sa ₱22.24 milyon ang hiniusang year-end bank balance ni Duterte ug sa iyang bana nga si Atty. Manases “Mans” Carpio kaniadtong 2024, samtang ₱21.13 milyon ang kantidad nga gilista sa SALN ni Duterte ubos sa kategoryang “others.”
Gilauman nga magsugod ang kampo sa depensa sa pagpresentar sa ilang mga saksi ug ebidensiya sa Nobyembre 9,2026 sa pagpadayon sa impeachment trial. Ang nahibiling Article II sa impeachment complaint naglakip sa mga alegasyon sa dili maipasabot nga kadato, kakulang sa tukmang deklarasyon sa mga kabtangan, ug pagbaton og ginadili nga interes sa negosyo.
