Gikasuhan sa Office of the Ombudsman ang pito ka opisyal sa DPWH Region XII sa Sandiganbayan tungod sa giingong kalambigitan sa ₱491-milyong road right-of-way (RROW) scam sa General Santos City.
Lakip sa mga giakusahan sila kanhi Regional Director Subair Saro Diron ug kanhi Assistant Regional Director Laureano B. Suan Jr., human nakakita ang Ombudsman og igong ebidensiya alang sa 18 ka counts sa malversation ug 18 ka counts sa paglapas sa Anti-Graft and Corrupt Practices Act.
Nag-ugat ang mga kaso sa imbestigasyon sa National Bureau of Investigation (NBI) kalabot sa bayad sa RROW sa 18 ka parsela sa yuta alang sa Digos-Makar National Road, diin giingong gigamit ang mga dokumentong peke ug giusab ang petsa.
Base sa testimonya sa saksi nga si Roberto Catapang Jr., giingong adunay pagkunsabo aron mapataas ang kantidad sa pondo pinaagi sa paggamit sa appraisal value kaniadtong 2009 alang sa mga yutang nakuha pa sa dekada 1990.
Gawas sa mga kasong kriminal, gimandoan usab sa Ombudsman ang pagtangtang sa serbisyo kang Ansare Mariga Busran, kanhi Legal Officer sa DPWH Region XII.
