Giaprobahan sa House of Representatives sa ikatulo ug kataposang pagbasa ang P7.2-trilyong national budget alang sa 2027 ubos sa House Bill No. 10858.
Nakuha sa House version sa General Appropriations Bill ang 281 ka boto pabor, 13 supak ug usa ka abstention.
Sumala sa House Committee on Appropriations, gigiyahan sa edukasyon ug healthcare ang mga kausaban sa budget. Matud ni Nueva Ecija Rep. Mikaela Suansing, nagpabiling pinakadakong prayoridad ang edukasyon, samtang gitumong sa health sector ang pagpalapad sa serbisyo ug pagpagaan sa gasto sa mga pamilya.
Gipabilin ang P1.107 trilyon alang sa edukasyon, lakip ang P10.055 bilyon para sa scholarship, school safety ug learning recovery. Alang sa healthcare, gigahin ang P23.97 bilyon sa Medical Assistance Program ug P1.55 bilyon sa Health Facilities Enhancement Program.
Apil sa budget ang P10 bilyon nga Presidential Assistance to Farmers and Fisherfolk ug P4.96 bilyon alang sa farm-to-market roads, isip suporta sa agrikultura ug food security atubangan sa El Niño.
Samtang, gigahin ang P1 bilyon alang sa fuel subsidies, P500 milyon sa Service Contracting Program ug P75 milyon sa NCR Busway Project.
Atol sa deliberasyon, gikuwestiyon sa mga mambabalaod ang kakulang sa transparency sa mga pag-usab sa budget. Nanawagan si House Speaker Faustino Bojie Dy nga bantayan ang pagpatuman niini aron masiguro ang accountability ug mapanalipdan ang pondo sa katawhan.
