Miapil ang Pilipinas sa gihimong pag walkout sa United Nations General Assembly samtang misaka sa entablado si Israeli Prime Minister Benjamin Netanyahu aron maghatag og pakigpulong niadtong Huwebes, sumala sa kumpirmasyon sa Department of Foreign Affairs o DFA niadtong Domingo.
Gipasabot ni DFA spokesperson Analyn Ratonel nga ang pag-apil sa nasod sa walkout nagpakita sa kalibotanong panaghiusa alang sa kalinaw sa Middle East, lakip ang panawagan sa tanang panig nga undangan ang mga lihok nga makadaot sa mga kahimtang alang sa kalinaw.
Gibutyag sa DFA ang dakong kabalaka sa Pilipinas sa nagkagrabeng krisis sa Gaza, sa pagpadayon sa E1 settlement plan sa Israel, ug sa nagkadaghang bayolente sa West Bank.
Matud ni Ratonel, ang maong mga lakang mahimong makababag sa pagkab-ot sa hustong, malungtaron ug komprehensibong solusyon sa panagbangi sa Middle East, samtang padayon nga gisuportahan sa Pilipinas ang two-state solution.
Miuban sa pag-gawas sa bulwagan ang napulo ka delegado sa dihang gisugdan ni Netanyahu ang iyang pakigpulong.
Gitawag usab ni Netanyahu nga “moral cowards” ang mga opisyal nga miapil sa protesta, nga maoy ikatulong sunod-sunod nga tuig nga adunay mga delegado nga mipahigayon og walkout atol sa iyang pakigpulong, human sa susamang mga hitabo niadtong 2024 ug 2025.
Sa pagkakaron, padayon nga gibutyag sa Pilipinas ang suporta niini sa kalinaw sa Middle East ug sa pagpaningkamot alang sa usa ka malungtaron nga solusyon sa nagpadayon nga panagbangi sa rehiyon.
