Nanawagan si Senate Committee on Health Vice Chairman Senator Christopher “Bong” Go sa nasyunal nga pagamhanan nga ibalik sa katawhan ang pondo sa gobyerno pinaagi sa paspas ug igo nga ayuda, ilabina karon nga nag-atubang ang nasod og krisis ug grabeng pagbaha.
Matud sa senador, gikan sa katawhan ang kuwarta sa gobyerno busa angay kining mapahimuslan pinaagi sa hapsay nga serbisyo ug direktang tabang panahon sa kalamidad ug panginahanglan.
Gipahayag kini ni Go atol sa iyang pagbisita sa Muntinlupa City aron personal nga susihon ang kahimtang ug maghatod og ayuda sa mga residente nga naapektuhan sa sunog.
Sa wala pa ang iyang pag-adto sa Muntinlupa, mibisita usab ang senador sa lalawigan sa Pampanga diin iyang nakita ang kalawom sa baha ug kadak-on sa kadaot nga dala sa Hanging Habagat sa dakong bahin sa Central Luzon.
Tungod niini, giinsistir ni Go nga angay unahon sa gobyerno ang pagtabang sa mga Pilipinong nanginahanglan gumikan kay wala nay laing masaligan taliwala sa sunod-sunod nga kalamidad sa Pilipinas.
