Nadawat na sa Senado ang mga dokumentong gisumite sa Bureau of Internal Revenue (BIR) nga may kalabotan sa tax records ni Vice President Sara Duterte, bana niyang si Atty. Mans Carpio, ug sa mga korporasyong giingong konektado kanila.
Sumala sa Senado, ang maong mga dokumento, lakip na ang ubang papeles nga gipatawag pinaagi sa subpoena, kasamtangang gi-inventory ug giproseso sa dili pa ipanghatag ang mga kopya ngadto sa tanang partido nga nalambigit sa impeachment proceedings.
Dugang pa niini, ang pagpagawas sa mga tax records gikan sa BIR gihatagan og awtorisasyon ni Pangulong Ferdinand Marcos Jr. Gipasabot sa Senado nga ang pagsusi sa maong mga tax records nagtumong sa pag-imbestigar sa posibleng iregularidad sa paggamit sa pondo ug sa operasyon sa mga korporasyong nalambigit sa maong mga indibidwal.
Sa pagkakaron, gipasiguro sa Senado nga ang tanang ebidensya maampingong matala ug maproseso una kini gamiton sa nagpadayon nga impeachment trial. Kahinumduman nga giisip ang maong lakang isip kabahin sa paningkamot sa Senado aron mapalig-on ang transparency ug accountability sa nagpadayon nga impeachment proceedings.
