Miabot na sa dili mouos sa 15 ka mga tawo ang namatay human sa magkabulag nga pagguho sa yuta sa Sarangani ug Lanao del Sur niadtong Biyernes sa kaadlawon, sumala sa mga lokal nga awtoridad.
Sa Malapatan, Sarangani, misaka sa 10 ang ihap sa mga namatay human matabunan sa yuta ang mga balay sa Barangay Poblacion, base sa taho sa Municipal Disaster Risk Reduction and Management Office o MDRRMO.
Sumala sa report, gikan sa duha ka pamilya ang mga biktima, lakip ang pipila ka mga bata. Usa ka 31-anyos nga lalaki ang naluwas gikan sa guho ug gidala dayon sa ospital alang sa pagpatambal.
Matud ni Malapatan Mayor Salway Sumbo Jr., gisugdan ang rescue operation mga alas-6 sa buntag human ipahibalo sa mga opisyal sa purok ang nahitabong insidente. Giingon usab sa mayor nga dili kuno kaayo lalom ang pagkaguho sa yuta, apan wala na maluwas ang ubang mga natabunan.
Gisusi pa sa mga awtoridad ang posibleng hinungdan sa landslide, lakip na ang posibleng epekto sa magnitude 7.8 nga linog nga miigo niadtong Hunyo 8, 2026 nga mahimong nakapaluya sa yuta sa maong lugar.
Tungod sa maong insidente, plano sa pamahalaang panlalawigan nga ibalhin ang mga pamilyang nagpuyo duol sa dapit nga nahitaboan sa pagguho. Gibanabanang 115 ka pamilya gikan sa duha ka barangay sa Malapatan ang naapektuhan sa kusog ug padayon nga pag-ulan.
Samtang, sa Barangay Ngingir, Calanogas, Lanao del Sur, lima usab ka mga tawo ang namatay samtang unom pa ang padayong gipangita human sa laing landslide.
Sumala sa Lanao del Sur Police Provincial Office o LDSPPO, duha ka mga tawo ang nasamdan sa maong insidente nga gituohang resulta sa walay hunong nga kusog nga pag-ulan sa lugar.
Nagpadayon ang search and rescue operation alang sa unom pa ka mga tawo nga gituohang nalubong uban sa ilang mga balay. Naglisod usab ang mga awtoridad sa pag-abot sa apektadong lugar tungod kay dili na malabyan sa mga sakyanan ang pipila ka bahin sa kalsada.
