Gihimakak sa kampo ni Vice President Sara Duterte ang mga alegasyon nga gituyo nilang palanganon ang impeachment trial sa Senado, ug giingong ang tanang objection sa depensa lehitimo ug subay sa balaod.
Matod kang Atty. Michael Poa, tigpamaba sa legal team ni Vice President Sara Duterte, ang mga objection sa depensa dili taktika aron malangan ang pagtaral, kondili mga lehitimong legal nga lakang nga ilang gisang-at kon adunay lig-on nga basehan ubos sa balaod.
Dugang pa, dili tinuod ang mga espekulasyon nga mikaylap sa social media nga gituyo sa depensa ang paglangan sa impeachment trial, ilabina human sa sunod-sunod nga mga objection ni Atty. Carlo Joaquin Narvasa atol sa pagtaral.
Gipasiugda usab ni Poa nga gusto mismo sa ilang kampo nga mahuman sa labing sayong panahon ang impeachment trial aron dili na magdugay ang pag-atubang ni Vice President Sara Duterte sa maong proseso.
Lakip sa iyang gipahayag nga nagtuo usab sila nga parehas ang tumong sa prosecution panel nga mapadali ang paghuman sa pagtaral subay sa gitugot sa balaod.
Samtang, gipahibalo ni Trial Presiding Officer Francis Escudero nga posible pang mapaspasan ang dagan sa impeachment trial sa umaabot nga mga adlaw.
Kahinumduman nga una nang gibanabana nga mokabat og walo ka bulan ang impeachment trial aron makompleto ang gitakdang 92 ka trial days, apan adunay posibilidad nga muboan kini depende sa dagan sa presentasyon sa mga ebidensiya ug sa pagdumala sa Senado.
Sa kasamtangan, nagpadayon ang impeachment trial batok kang Vice President Sara Duterte, diin padayon nga gipresentar sa duha ka kampo ang ilang tagsa-tagsang mga argumento ug ebidensiya atol sa pagtaral.
