Gideklara sa PAGASA nga nahimong Tropical Depression “Henry” ang low pressure area (LPA) nga ilang gibantayan ang kasadpang bahin sa nasod. Sumala pa sa pinakabag-ong weather bulletin, ang sentro sa bagyo namatikdan sa gilay-on nga 115 kilometro sa kasadpan-habagatan sa Abucay, Bataan.
Nagdala kini og kusog sa hangin nga 45 kilometro matag oras duol sa sentro ug mga pagbugso nga moabot sa 55 kilometro matag oras, samtang naglihok kini paingon sa northwest sa gikusgon nga 25 kilometro matag oras. Dugang pa niini, ang sirkulasyon sa hangin sa bagyo mokabat og 150 kilometro gikan sa sentro niini.
Sa kasamtangan, gipataas na ang Tropical Cyclone Wind Signal (TCWS) No. 1 sa pipila ka bahin sa Luzon, lakip ang habagatan-kasadpang bahin sa Zambales, kasadpang bahin sa Bataan, ug sa Lubang Islands.
Sumala sa PAGASA, gilauman nga makasinati ang maong mga lugar og kusog nga hangin sulod sa sunod 36 ka oras, nga adunay gikusgon nga 39 hangtod 61 kilometro matag oras, nga posibleng hinungdan sa menor hangtod gamayng kadaot sa kinabuhi ug kabtangan.
Busa, nagpadayon ang pag-awhag sa PAGASA sa publiko nga magmatngon, mag-andam sa posibleng epekto sa bagyo, ug padayon nga subayon ang sunod nilang mga weather advisory ug updates.
