Mipagawas ang Department of Energy (DOE) og show cause orders batok sa 175 ka power generation companies sa tibuok nasod tungod sa kapakyasan sa pagsumite sa gikinahanglang self-assessment forms.
Sumala pa kang DOE Secretary Sharon Garin, kabahin kini sa kampanya sa ahensya aron masulbad ang nagbalik-balik nga forced outages ug dugayng pagkunhod sa kapasidad sa pipila ka mga planta sa kuryente nga nakaapekto sa suplay sa elektrisidad ug sa mga konsumidor.
Dugang pa niini, giingon sa DOE nga lakip sa mga posibleng paglapas ang kakulang sa gikinahanglang minimum fuel stock nga importante aron mapadayon ang walay hunong nga serbisyo sa publiko.
Bisan pa niini, gipasabot sa ahensya nga wala pa kini nagpasabot nga nakasala na ang mga kompanya, tungod kay hatagan pa sila og higayon sa pagpasabot sa ilang bahin.
Kahinumduman, nagpabilin pa ubos sa yellow ug red alert ang Visayas Grid tungod sa wala damha nga paghunong sa operasyon sa pipila ka mga planta sa kuryente.
