Gibatikos sa House prosecution panel ang tubag ni VP Sara Duterte sa mga Articles of Impeachment batok kaniya, nga ilang gihulagway nga balik-balik lamang ug walay bag-ong depensa.
Sumala ni House prosecution panel spokesperson Rep. Zia Alonto Adiong, ang 51-panid nga tubag sa Bise Presidente nagpakita lamang nga walay lig-on nga counter-evidence aron pabulaanan ang mga alegasyon batok kaniya. Matud pa niini, sukad pa sa sinugdanan, teknikalidad ug konstitusyonalidad lamang ang padayon nga gipasikad sa kampo ni VP Sara.
Dugang pa niini, punto-por-punto nga gitubag ni VP Sara ang upat ka Articles of Impeachment, lakip ang mga alegasyon sa misuse of confidential funds, unexplained wealth, graft and corruption, panuhol ug grave threats. Gipasiugda usab sa Bise Presidente nga dili pa pinal ang Notice of Disallowance sa Commission on Audit, legal ang pagpagawas sa pondo ug walay ebidensya nga siya ang naghatag og kuwarta aron manuhol sa mga opisyal sa DepEd.
May kalabotan usab sa grave threats, gigamit ni VP Sara ang freedom of expression isip depensa, nga nag-ingon nga wala siyay tuyo nga mameligro sa kinabuhi ni PBBM, First Lady Liza Araneta-Marcos ug kanhing House Speaker Martin Romualdez, kondili mitubag lamang siya sa pangutana bahin sa “Operation Romanov.”
Apan, gibalikan kini ni Rep. Adiong nga nag-ingon nga walay absolute freedom of expression ug klaro umanong direktang hulga batok sa Pangulo ang gipahayag sa Bise Presidente nga nasaksihan sa publiko pinaagi sa telebisyon.
