Mipadayag og panawagan si Senador Panfilo “Ping” Lacson ngadto sa mga otoridad nga palig-onon pa ang intelligence operations aron mas epektibong madakop ang mga high-profile fugitives sa nasod.
Sumala pa sa senador, importante ang lig-on nga intelligence work ug ang maayong koordinasyon sa mga law enforcement agency sa pag-ila ug pagsubay sa mga prominenteng personalidad nga kasamtangang gipangita sa balaod, lakip si Senador Ronald “Bato” dela Rosa, negosyanteng si Atong Ang, kanhing Gen. Gerald Bantag, ug kanhing kongresista Zaldy Co nga giingong nalambigit sa flood control scam ug gituohang anaa karon sa France.
Gipasiugda usab niya nga masayang lamang ang resources sa gobyerno kung walay tarong ug tukmang intelligence gathering una pa ipatuman ang operasyon batok sa mga pugante.
“Kinahanglan buntag, udto ug gabii ang intelligence sa mga law enforcers,” matud pa ni Lacson, nga kanhi hepe sa Philippine National Police (PNP).
Sa maong pahayag, gipanghimakak usab sa senador ang mga alegasyon ug sayop nga impormasyon nga nagdungog nga giapil siya sa dili husto nga paghimo og pagkaparehas sa iyang kasinatian kaniadto ug sa sitwasyon karon ni Sen. Bato dela Rosa.
“Dili tanang abogado pareho—naay maayo, naay tapulan, ug naay mamakak,” dugang niya.
Gipatin-aw usab ni Lacson nga lahi ang iyang sitwasyon kaniadto, kay ang iyang pagtago iyang giingon nga “fugitive from injustice” human siya gi-target ni kanhing Pangulong Gloria Macapagal Arroyo.Sumala pa niya, ang iyang desisyon kaniadto gibase sa nag-iral nga jurisprudence sa maong panahon, nga sa ulahi giusab ug gikunhuran ang sakop sa 2025.Sa kasamtangan, gipadayag niya nga si Sen. Dela Rosa nag-atubang sa usa ka lehitimong arrest warrant gikan sa International Criminal Court (ICC) may kalabotan sa giingong papel niini sa war on drugs sa administrasyon ni kanhing Pangulong Rodrigo Duterte.
