Nagpadayon karon ang imbestigasyon sa Philippine National Police (PNP batok sa mga supervisor sa duha ka aktibong pulis gikan sa Davao de Oro nga nadakpan uban sa upat ka sibilyan tungod sa giingong ilegal nga pagtransport og mineral ores nga nagkantidad og ₱290,000 sa Misamis Oriental.
Sumala kang PNP Chief Gen. Jose Melencio Nartatez Jr., gi-review na karon ang “command responsibility,” ug posibleng mapanubag usab ang ilahang mga labaw kung mapamatud-an nga adunay kakulangan sa pagbantay.
Matud pa niya, dili tugotan sa PNP ang maong klase sa kalihokan ug dili nila pasagdan nga madaot ang integridad sa organisasyon tungod sa pipila ka abusadong miyembro niini.
Nasayran nga ang duha ka pulis nga usa ka Police Senior Master Sergeant ug usa ka Police Staff Sergeant nga naka-assign sa Monkayo Municipal Police Station diin nadakpan kauban ang upat ka sibilyan sa checkpoint sa Opol niadtong Lunes sa hapon.
Ang unom ka suspek anaa na karon sa kustodiya sa kapulisan ug mag-atubang og kaso sa paglapas sa Republic Act No. 7942 o Philippine Mining Act.
Sa pagkakaron, gipapha na usab sa ilahang mga posisyon ang duha ka pulis nga nalambigit sa insidente.
Gipasabot pa ni Nartatez nga adunay “zero-tolerance policy” ang PNP batok sa mga pulis nga masayop sa ilang katungdanan, ug gawas sa kasong kriminal, atubangon usab sa mga suspek ang administratibong kaso alang sa grave misconduct.
Gimandoan usab sa PNP chief ang Internal Affairs Service sa pag-imbestiga sa posibleng mga network sa mga pulis nga nalambigit sa ilegal nga pag-escort sa transportasyon sa mineral ores.
