Magpatuman ang Department of Transportation (DOTr) og duha ka bulan nga toll pamenos alang sa mga Public Utility Vehicle (PUV), bus, ug freight trucks o logistics vehicles sugod karong Lunes, Marso 3, hangtud Mayo 22.Sumala sa DOTr, ipatuman kini pinaagi sa semanahan nga rebate alang sa mga kuwalipikadong sakyanan nga adunay RFID aron maminusan ang epekto sa pagsaka sa presyo sa lana. Ang hakbang gituyo aron matabangan ang mga driver, operator, ug pasahero sa pagpakunhod sa ilang gasto sa transportasyon.
Apil sa programa ang mga jeepney (Class 1), bus (Class 2), ug trucks (Class 3). Sa detalye, ang mga jeepney o Class 1 mahimong makatigom og hangtod P18 matag tibuok biyahe. Alang sa Class 2 o mga bus, posible ang pamenos nga moabot og P47 matag tibuok biyahe, samtang sa Class 3 o trucks, moabot og P72 matag tibuok biyahe.Ang maong pamenos ipahatag pinaagi sa semanahan nga rebate sa RFID accounts sama sa Easytrip.
Kinahanglan lamang nga magparehistro sa LTFRB ang mga operator ug dili sila sakop sa ubang toll discount programs aron makabenepisyo sa maong lakang.Matud pa sa gobyerno, kini nga inisyatibo kabahin sa ilang tubag sa padayon nga pagsaka sa presyo sa petrolyo, ilabina tungod sa nagpadayon nga tensyon sa Middle East. Dugang pa, gi-awhag ang tanan nga operator nga siguraduhon ang RFID registration aron makadawat dayon sa rebate ug malikayan ang delay sa benepisyo.Ang DOTr nagpasalig nga padayon nila bantayan ang implementasyon sa programa ug maghatag og updates sa publiko kon adunay kausaban sa schedule o coverage sa pamenos.
