Wala pa’y kasiguruhan kung kanus-a mahuman ang kaso ni kanhi Presidente Rodrigo Duterte sa International Criminal Court sa The Hague, Netherlands.
Gipasabot ni Atty. Kaiser Cordero, usa ka international lawyer, nga ubos sa Article 61 sa Rome Statute, adunay tulo ka posibleng mahitabo human sa confirmation of charges hearing sa Biyernes, Pebrero 27, 2026.
Una, posible nga i-confirm sa Pre-Trial Chamber ang mga kaso batok kaniya.
Kung mahitabo kini, magsugod na ang pormal nga pagdungog sa Trial Chamber, diin didto sayron kung mapamatud-an ba nga guilty beyond reasonable doubt si Duterte.
Ikaduha, posible usab nga dili i-confirm ang mga kaso ug ibasura kini, nga magpasabot nga makapauli na ang kanhing Presidente.
Apan adunay ikatulong kapilian ang ICC — mahimo nilang i-adjourn ang proseso ug hatagan og higayon ang prosecution nga magpresentar og dugang ebidensiya.
Nagpasabot kini nga mahimo silang mobalik ug mag-file pag-usab dala ang mas lig-on nga kaso.
Tungod niini, dili pa mahimong makagawas dayon si Duterte, dili sama sa ubang korte nga kon kulang ang ebidensiya, diretso na nga ma-dismiss ang kaso.
Sa ICC, adunay higayon ang prosecution nga usbon ug palig-onon ang ilang mga ebidensiya.
Sa karon, ang gisusi sa Pre-Trial Chamber mao kung adunay “substantial grounds to believe” nga adunay nahitabong krimen ug may partisipasyon ang akusado.
Dili pa kini pinal nga hukom kung siya ba guilty o ma-acquit sa nasampit nga pagdungog.
