Gipadayon sa Naval Forces Eastern Mindanao (NFEM) ang ilang maritime patrol ug search and rescue (SAR) operations niadtong Enero 27, 2026, nga karon nakapokus sa bag-ong giila nga search sector alang sa mga pasahero sa recreational motor banca AMEJARA nga padayon pang wala makaplagan.
Sumala sa Philippine Navy, ang BRP Tagbanua (LC296) karon nagpatuman og masinsinang pagpangita sa katubigan nga kapin 72 nautical miles habagatan-kasadpan sa Palimban Point, Palimbang, Sultan Kudarat.
Gipalapdan usab sa barko ang sakop sa SAR gikan sa Sarangani Bay ug Makima, Sarangani Province, padulong sa Sector 5, ang bag-ong search area nga gitakda sa Office of Civil Defense (OCD) Region XI.
Matod sa NFEM, kabahin kini sa padayon ug koordinadong paningkamot aron dali nga matun-an ang kahimtangan ug mapangita ang nahibiling mga missing nga pasahero sa MBCA Amejara.
Gipasiugda sa Philippine Navy nga lig-on ang ilang commitment sa pagpadayon sa maritime patrol ug SAR operations, kauban ang Eastern Mindanao Command (EMC), Philippine Coast Guard (PCG), Task Group TOW-EM, OCD Region XI, ug uban pang partner nga ahensya, aron masiguro ang kaluwasan sa kadagatan ug ang hapsay nga pag-recover sa mga nawawala.
Padayon ang operasyon samtang naglaum ang mga otoridad nga adunay positibong resulta ang gipakusgang pagpangita sa bag-ong search sector.
