Gitukod sa Davao City Council ang usa ka bag-ong direksyon sa environmental sustainability pinaagi sa gisugyot nga ordinansa nga maghatag og dugang insentibo alang sa electric vehicles (EVs) ug sa husto nga pag-recycle ug pagdumala sa mga baterya. Ang inisyatiba gipangunahan ni City Councilor Temujin “Tek” Ocampo, chairman sa Committee on Environment, nga nagtumong sa pagdani og mas daghang green investments ug pagpanalipod sa kalikupan.
Sumala ni Ocampo, ang ordinansa naglangkob sa insentibo alang sa EV manufacturers, dealers, private ug government users, charging station operators, spare parts suppliers, ug labi na sa mga pasilidad nga nagdumala sa battery recycling ug disposal. Pinaagi niini, gilauman nga mapalig-on ang local EV ecosystem aron masiguro ang luwas ug limpyo nga pagdumala sa mga hazardous components sa electric vehicles.
Gipasabot sa konsehal nga ang gisugyot nga polisiya motampo ug mopuno sa Davao Local Incentive Code, apan mas klaro ug mas tutok ang sakop niini alang sa EV industry ug battery management. Tumong sa ordinansa nga dili lamang magpalapad sa paggamit sa electric vehicles, kondili usab maghatag og solusyon sa environmental risks nga dala sa improper disposal sa EV batteries.
Ilawom sa gisugyot nga mga probisyon, ang EV battery recycling ug repurposing facilities mahimong makadawat og 100 porsyentong exemption sa local business tax ug lease fees sulod sa unang tulo ka tuig sa operasyon, samtang 75 porsyento nga discount sa ika-upat nga tuig ug 50 porsyento sa ikalimang tuig ang ipatuman. Dugang pa niini ang 50 porsyento nga discount sa real property tax sa ika-upat ug ika-limang tuig, isip pagdasig sa dugayng investment ug malungtarong operasyon.
Padayon usab nga gipasiugda ni Ocampo ang kamahinungdanon sa usa ka lig-on nga balaudnon alang sa responsableng pagdumala sa EV batteries, ilabi na kay bisan pa man og giila nga green technology ang electric vehicles, delikado gihapon sa kinaiyahan ang ilang mga baterya kon dili sakto ang pag-recycle ug pagdumala. Ang maong balaud gilauman nga makapugong sa posibleng polusyon ug makahatag og dugang proteksyon sa kahimsog sa katawhan.
Gilauman sa konseho nga magpahigayon pa og usa o duha ka committee hearing aron mas hisgutan ug maayuhan ang detalye sa ordinansa, sa dili pa kini dal-on sa plenary session alang sa pinal nga pag-apruba. Ang inisyatiba giila nga usa ka lakang sa Davao City padulong sa mas limpyo, mas luwas, ug mas malungtarong urban transport system.
