Miabot na sa kapin 500 ka mga tawo ang nakbsan sa kinabuhi, lakip ang pito ka mga bata, sa nagpadayong protesta batok sa gobyerno sa tibuok Iran, sumala sa U.S.-based Human Rights Activists News Agency (HIRANA).
Subay sa datos sa HIRANA, 10,600 ka mga tawo ang nadakpan samtang nagpabilin ang lihok-protesta nga misulod na sa ika-14 ka adlaw. Samtang mokabat usab ang 109 ka miyembro sa security forces nga napatay taliwala sa mga protesta.
Tungod sa kagubot, natala usab ang halos 60 ka oras nga pagkawala sa internet sa Iran, nga gituhuan nga usa ka lakang aron mapugngan ang paglapad sa impormasyon ug koordinasyon sa mga raliyista.
Nagsugod ang mga protesta niadtong katapusan nga Domingo sa Disyembre, human nagmartsa ang mga tawo sa sentro sa Tehran batok sa nagkataas nga inflation ug padayon nga pagkunhod sa bili sa nasodnong kuwarta nga rial.
Sa paglapad sa lihok-protesta, klaro usab ang panawagan batok sa gobyerno, lakip ang mga gisinggit nga nag-awhag sa mga estudyante nga mahimong tingog sa katawhan ug panawagan nga pahagsaon ang Islamic Republic.
Gipangunahan sa Supreme Leader nga si Ayatollah Ali Khamenei ang operasyon aron mapahunong ang mga nagpadayong rally, diin nareport nga gigamit ang tear gas ug sa pipila ka higayon lakip ang mga pusil.
Samtang gibutyag sa mga opisyal nga andam silang paminawon ang mga kabalaka sa katawhan kabahin sa ekonomiya, apan giila usab nila nga ang kagubot resulta sa mga “rioter” ug sa alegasyon sa pagpangilabot sa mga langyaw nga nasud, ilabi na ang Estados Unidos ug Israel.
Sa laing pahayag, gipamugos ni Pangulong Masuod Pezeshkian nga ang mga langyaw nga terorista adunay kalambigitan sa kagubot.
Samtang iyahang gisaaran ang mga nahisgutan nga sulbaron sa gobyerno ang nagkagrabeng problema sa ekonomiya sa nasud samtang nagbahad batok sa bisan unsang langyaw nga interbensyon.
