Gireklamo sa daghanang lumad sa Tribung Dibabawon ang iligal quarry sa Barangay Emilia, Laak, Davao de Oro nga alegasyong si Mayor HoneyBoy Libuangan ang nagtugot ug nagpaluyo sa maong kalihukan.
Sumala pa sa mga lumad, dugay na ang operation sa ilang lugar, apan wala matud pa kini giagi sa opisyal nga sesyon sa barangay ug posible usab nga walay klarong permit ug pagkuha sa Free, Prior, and Informed Consent (FPIC) nga usa ka kinahanglanon ilabi na og adunay kalabutan sa ancestral domain.
Base sa Provincial Ordinance No. 104-2022, gikinahanglan nga ang tanang operasyon sa quarry sa probinsya moagi sa hustong proseso sama sa pagtugot sa Sangguniang Panlalawigan ug pagkuha sa kompletong mga permit gikan sa Department of Environment and Natural Resources ug sa Provincial Environment and Natural Resources Office diin naglakip niini ang pagpasaka og barangay resolution nga gikinahanglang aprobahan sa konseho, ug dili lamang personal nga sabot-sabot.
Sa ekslusibong pakighinabi sa Bombo Radyo Davao sa usa ka residente, posibleng dunay kasayuran ang kapitan sa maong iligal nga kalihukan gumikan wala matud pa kini giagi sa session sa barangay council, hinungdan nga ubang mga opisyal wala nakabalo.
Dugang pa, matag gabie ang operasyon ug backhoe sa munisipyo ang ginagamit nga maoy nahimong hinungdan nga nagkalalom ang kinalutan.
Gani, mismong ang munisipyo matud pa ang nagbutang sa karatula nga hugot nagdili sa pag-quarry.
