Gipa-pison mismo ni Mayor Rey Uy ang kapin 300 ka piraso sa mga modified mufflers o mas nailhan nga bora-bora, atol sa usa ka operasyon nga gihimo sa Traffic Management Unit (TMU) kaganihang buntag.
Matod pa sa mayor, padayon ang dakop sa mga motorista nga naggamit gihapon og bora-bora bisan pa man sa gabii, kay bawal kini ubos sa city ordinance tungod sa kasaba nga ginadala niini nga nakasamok sa mga residente.
“Hangtud adunay magpabilin nga mogamit og bora-bora, dili kami moundang sa pagpangdakop,” matud pa ni Uy nga nagpasabot nga istrikto nila kining ipatuman aron mapreserbar ang kalinaw ug kahapsay sa lungsod.
Gipasabot usab sa TMU nga magpadayon ang ilang surveillance ug checkpoints aron masiguro nga walay makalikay sa balaod ug mapadayon ang disiplina sa dalan.
