Gipadayag sa Civil Service Commission (CSC) XI ang seryosong pagdili sa tanang kawani sa gobyerno nga malambigit sa bisan unsang klase sa sugal samtang oras sa trabaho. Ilalom niini ang online gambling, mobile betting games, ug personal nga pag-adto sa mga sugalan.
Sumala ni CSC XI Chief Human Resource Specialist Sheryl O. Yap, dili lamang kini usa ka paglapas sa balaod, kundili makadaot usab sa imahe ug kredibilidad sa serbisyo publiko. Ang masakpan nga empleyado mahimong moatubang sa administrative sanctions nga ang kadako sa sala nag-agad sa kalapasan.
Kabahin niini, gipangayo sa CSC ang kooperasyon sa katawhan nga magreport dayon kon adunay makita nga opisyal o kawani nga mosupak sa pamalaod. Gipasabot usab sa ahensya nga ang pagmintinar sa integridad ug propesyonalismo sa mga lingkod-bayan maoy dakong bahin aron mapalambo ang pagsalig ug respeto sa katawhan ngadto sa gobyerno.
