August 26, 2025 | 9:06 PM
Gipadayag ni Batangas 1st District Congressman Leandro Leviste nga wala na nagpahigayon og opisyal nga bidding ang mga proyekto sa Department of Public Works and Highways (DPWH).
Hinuon, gipili na lang kuno ang mga contractor nga suod sa mga opisyal nga anaa sa posisyon, kapuli sa kickback o komisyon.Kabahin niini, gibutayg usab ni District Engineer Abelardo Calalo kang Leviste ang mga ngalan sa dagkong contractor ug ilahang papel ubos sa kanhing representante sa distrito.
Matod ni Leviste, sa sulod lamang sa tulo ka tuig, posibleng mokabat sa kapin 1 bilyon pesos ang matigom alang sa Congressman.
Dugang pa sa kongresista, iyahang nakita nga usa sa mga rason nganong nagaduol kaniya ang mga contractor mao ang iyahang pag-inspeksyon sa mga flood-control projects sa 1st District sa Batangas, ilabi na ang mga proyekto nga dali lamang nadaot.
Gipasabot niini nga kung makadawat na og kickback ang usa ka Congressman, posible nga dili na niini adtuon ug imbistigahan ang mga substandard nga proyekto.
Gibarugan usab ni Leviste nga panahon na aron matapos ang korapsyon sulod sa DPWH tungod kay kini nakadaot na sa kalidad sa mga proyekto nga gihatag alang sa katawhan.
Tungod niini, iyahang gidasig ang district engineer ug uban pang mga kanhing empleyado sa DPWH o mga contractor nga mahimong state witness aron hingpit nga mapadayag ang gilapdon sa korapsyon.
Sa laing bahin, sa pakighinabi sa Bombo Radyo Philippines kung nakahimamat na ba sila ni Sec. Manuel Bonoan, iyahang gipadayag nga wala pa sila nakahisgot sa kalihim apan iyahang gipasidunggan ang dali nga aksyon niini kabahin sa isyu.
Dugang pa sa opisyal, naglaum siya nga adunay sunod nga mga aksyon ug dili lamang kutob sa pagpangdakop.
Andam usab siya nga makig-estorya kung gikinahanglan, apan iyang gisalig kini sa kapasidad ni Bonoan.
