Nagpaklaro si Secretary Manuel Bonoan sa Department of Public Works and Highways (DPWH) sa pangunahing tuyo sa gitukod nga rock shed project sa Tuba, Benguet.
Ang maong proyekto gibisita ni Presidente Ferdinand Marcos niadtong Domingo (Ago. 24) ug gitawag nga “walay pulos” tungod kay halos dili kini magamit ug mas nakadaot pa sa lokal nga ekonomiya, samtang naghatag usab kini og hulga sa kinabuhi ug kabtangan.
Gipondohan ang maong proyekto og P264 milyon, ug gidisenyo kini aron mapanalipdan unta ang mga motorista gikan sa mga nagakahulog nga bato.
Sumala pa ni Sec. Bonoan, nga ang rock shed usa ka mahinungdanon nga engineering intervention aron maprotektahan ang mga motorista nga molabay sa lugar, tungod kay kini nailhan nga ‘geologically unstable area’, diin kasagaran nga nagakahulog ang dagkong tipak sa bato gikan sa bukid, kauban ang kanunay nga landslide.
Sa tinuod lamang, pila na ka rock shed ang natukod sa Marcos Highway sa Tuba, Benguet, ug sa probinsya sa Cagayan, ug epektibo kini nga nagserbisyo isip proteksyon sa mga motorista ug mga residente.
Sumala pa ni Bonoan, gihatagan na niya ang regional office sa DPWH og mando nga magsumite og report alang sa dali nga pag-ayo sa nadaut nga bahin sa rock shed.
Ang maong pader nga magkonektar sa maong istruktura nakompromiso tungod sa nagdahili nga yuta nga gisandigan niini, busa nagpabilin ang hulga sa mga motorista nga nagalabay sa lugar.
