Nanawagan si Senador Benigno “Bam” Aquino og mas hugot nga pagsusi sa paggasto sa Department of Public Works and Highways (DPWH) sa P360 bilyon nga pondo alang sa flood control karong tuiga, taliwala sa nagpadayon nga problema sa pagbaha sa daghang bahin sa nasud.
Sa iyang gidusong resolusyon, iyang gidasig ang mga komite sa Senado nga magpahigayon og imbestigasyon aron masuta kung epektibo ba ang mga proyekto sa DPWH ug kung nasiguro ba nga sa husto nga lugar nagamit ang maong pondo.
Matod sa senador, sukad pa 2009 hangtod 2024, miabot na og P1.47 trilyon ang total nga budget alang sa flood control. Apan, daghang komunidad gihapon ang nagpabiling bulnerable sa pagbaha.
Gawas pa sa resolusyon, adunay mga taho usab nga migawas kabahin sa gikaingong peke nga flood control projects nga gitugyan sa pipila lamang ka contractors.
Sa laing imbestigasyon nga gihimo sa Senate Blue Ribbon Committee, giila ang halos P100 bilyon nga kantidad sa mga proyektong posibleng dunay anomalya.
Apil niini ang mga proyekto nga wala matapos, dili kinahanglan, o gipangbalik-balik lang sa parehong lugar.
Gipunting ni Aquino ang kamahinungdanon sa transparency ug accountability sa paggasto sa pondo, labi na kay ang epekto sa pagbaha direkta gyud nga gibati sa katawhan gikan sa kadaot sa mga kabtangan hangtod sa hulga sa kinabuhi.
Gilauman nga matuki sa Senado ang resolusyon sa umaabot nga sesyon, samtang nagpadayon ang kusog nga pag-ulan ug pagbaha sa pipila ka rehiyon sa nasud.
