Angol ang usa ka kawatan human niining gipanikpaw ang pipila ka mga gamit sulod sa usa ka opisina sa Juna Subdivision, Quimpo Boulevard ning siyudad.
Sa impormasyong nahagpat sa kapulisan nga miresponde, igo lamang matud pa natulog si alyas Jon, usa ka stay-in nga empleyado sa 267 Asian Hybrid Seed Technologies, Inc. kauban ang gwardiya sa susamang kompanya ganinang kadlawon, apan pag-abot alas 2 ganinang kadlawon, nakamatikod matud pa kini nga dunay kasikas sulod sa ilang buhatan, rason nga mibangon kini ug sa pagkumpirma niini nga dunay tawo, gilayon matud pa niining gipukaw ang gwardiya ug gipangsirad-an ang exit points, dayon nanawag sa kapulisan.
Sa dihang miabot na ang kapulisan sa maong dapit, gilayon nilang gisubay ang ground floor ug nasayrang misaka sa kisame ang suspek rason nga ilaha kining gimanduan ng mukanaog, apan nadalin-as kini nga maoy nahimong hinungdan sa pagka-angol sa suspek nga giilang si alyas Joemel, 19 anyos ug residente sa Banana Street, Ulha Village, Ulas ning siyudad. Sa pagkahulog niini, apil sab nga nahulog ang usa ka yunit sa cellphone nga mibalor og P1,000, usa ka computer mouse, duha ka laptop nga nagkantidad og P10,000, lain pang laptop nga mibalor og P55,000, charger sa cellphone ug 2 ka charger sab sa laptop.
Sa karon, ginahikay na ang kasong atubangon sa suspetsado.
