Misaka ang tubig-baha sa pipila ka lugar sa Davao City pagkahapon sa adlawng Martes, Agosto 19, 2025, human sa dugay-dugay nga pag-uwan nga dala sa easterlies.
Lakip sa naapektuhan ang Barangay Obrero, Roxas Avenue, ug ubang dapit sa syudad nga dali natabonan sa tubig.
Sa ulahing update alas 5:15 sa hapon, daghang kadalanan ang nalubog sa baha nga naghatag og kalisod sa daghang motorista ug residente nga nagbiyahe o naglakaw sa lugar.
Ang pipila ka sakyanan napugos paghunong samtang ang uban naglisod og agi tungod sa lawom nga tubig diin moabot sa tuhod. Gipasidaan sa mga awtoridad ang katawhan nga magbantay ug magpabilin nga andam sa posible pang pagtaas sa tubig kon magpadayon ang pag-uwan.
Gihangyo usab ang katawhan nga likayan ang pag-adto sa mga bahaon nga lugar aron malikayan ang peligro ug disgrasya.
Samtang gipahimangnoan usab ang mga residente nga nanimuyo duol sa sapa nga mag-igmat og daling mobakwit kon adunay mando sa lokal nga panggamhanan ilabi na kung mamatikdan nga kritikal na ang kondisyon aron malikay sa mga disgrasya.
