Gipasanginlan sa hepe sa Philippine National Police nga si Police Gen. Nicolas Torre III ang pipila ka gitawag nga DDS kon Duterte Diehard Supporters nga mao kuno ang nagpalapad sa sayop nga impormasyon pinaagi sa social media.
Usa sa mga video nga gikatakda, nagpakita og mga batan-on nga nagbutang og bangko sa tunga sa dalan nga hinungdan sa pagkabangga sa usa ka motorista. Apan base sa resulta sa cyber patrolling sa kapulisan, masuta nga dili kini nahitabo sa Pilipinas kondili sa Indonesia.
Sumala pa ni Gen. Torre, ang tuyo sa pagpakatag sa ingon nga mga video mao ang pagdaot sa ngalan sa nasud ug sa kasamtangang gobyerno.
Gipasabot usab niini nga magpadayon ang kapulisan sa pagbantay ug pagsubay sa social media aron mapugngan ang pagpanglimbong ug pagkaylap sa sayop nga impormasyon nga makadaot sa katawhan.
