Gipasanginlan ni Senate President Francis “Chiz” Escudero ang Kamara nga maoy nagpaluyo sa giingong malisyoso nga lihok ug demolition job batok kaniya, tungod sa iyang pagbabag matud pa sa impeachment case batok kang Bise Presidente Sara Duterte human mitamod lamang kini sa mando sa Korte Suprema.
Sumala pa niini, adunay pipila ka grupo nga gustong mapahawa siya sa puwesto aron sa dihang isumite ang impeachment complaint sa Pebrero 2026, wala na siya sa gahum ug sayon na lamang sa interested party ang pagpatuman sa plano sa mga pabor sa impeachment.
Gisalikway ni Escudero ang pasangil nga iyang gitabangan ang Centerways Construction aron makakuha og kontrata alang sa mga proyekto sa gobyerno.
Ang Centerways Construction maoy ikapito sa listahan sa top 15 flood control project contractors nga gipangalanan ni Presidente Ferdinand Marcos Jr.
Bisan og giangkon ni Escudero nga dugay na niyang higala ang tag-iya sa kompanya, iyang giklaro nga wala siya’y labot o partisipasyon sa maong negosyo.
