Nagpadangat karon sa ilahang kasub-anan ang Davao del Sur Police Provincial Office sa kalit ug sayong pagpanaw ni Patrolwoman Kay Remando Dumasig, 28 anyos, nga gihulagway nga usa ka dedikado ug masaligan nga sakop sa Matanao Municipal Police Station.
Kahinumduman nga nga nakabsan sa kinabuhi ang nahisgutan tungod sumala pa sa usa ka insidenteng accidental firing niadtong alas 6:50 sa gabii sa Hulyo 11, 2025, sulod mismo sa Female Quarter sa Matanao MPS, Purok Tahimik, Barangay Poblacion, Matanao, Davao del Sur.
Subay sa inisyal nga imbestigasyon, si Pat. Dumasig nag-andam sa iyang 9mm Girsan pistol nga adunay Serial No. T6368-22CK03370, nga gigahin kaniya isip service firearm, isip kabahin sa posibleng buy-bust operation.
Samtang iyang gi-load ang armas, nahulog sumala pa kini ug iyang gisulayan og salo, apan aksidenteng naigo ang trigger sa armas, hinungdan nga kini nibuto ug natunong sa iyahang ulo.
Human sa maong panghitabo, dali kining gidala sa MCDC Hospital sa dakbayan sa Digos alang sa emerhensiyang medikal nga pag-atiman, apan gidekla gihapon kini nakabsan na sa kinabuhi bisan sa paningkamot sa mga doktor ug medikal nga team.
Sa gihimong pagsusi sa Scene of the Crime Operatives (SOCO) sa nahitaboan, na-rekober ang armas nga anaa sa dulok sa biktima nga karon anaa na sa kustodiya isip kabahin sa padayon nga imbestigasyon.
Mipadayag usab og pahasubo si PCol.Leo T. Ajero, ang Provincial Director sa DSPPO, ngadto sa pamilya ni Pat. Dumasig. Nasayran nga si Patrolwoman Dumasig nagsilbi uban sa tinuod nga dedikasyon ug kadasig.
Ang iyang kamatayon usa ka makasubo nga pahimangno sa peligro nga ginatubang sa mga personel bisan pa sa panahon sa preparasyon.
Gipadangat usab niini ang ilahang lawom nga simpatiya ug pag-ampo sa iyang pamilya ug mga hinigugma niining panahon sa kasakit. Gipasalig usab sa kadumalaan sa nasampit nga kapulisan nga sundon ang hustong proseso ug imbestigasyon.
Nag-awhag karon ang opisyal nga pasidunggan ang pag-alagad ni Pat. Dumasig ug timan-an siya uban ang dako nga pagtahod nga angay gayud kaniya.
